ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ)- ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ କ୍ୟାଲକାଟା ହାଇକୋର୍ଟଙ୍କୁ ଚିଠି ଲେଖି ତାଙ୍କ ଆବେଦନ ଶୁଣାଣି ଅନ୍ୟ ଜଣେ ବିଚାରପତିଙ୍କ ଦ୍ୱାରା କରାଇବା ଅନୁରୋଧ କରିଛନ୍ତି। ଚଳିତ ବିଧାନସଭା ନିର୍ବାଚନରେ ଚର୍ଚ୍ଚିତ ନନ୍ଦିଗ୍ରାମ ଆସନରୁ ବିଜେପିର ଶୁଭେନ୍ଦୁ ଅଧିକାରୀଙ୍କ ଠାରୁ ମମତା ପରାସ୍ତ ହୋଇଛନ୍ତି। ତେବେ ଏହା ବିରୋଧରେ ସେ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଆସନ୍ତା ୨୪ ତାରିଖରେ ଏହା ଶୁଣାଣି ହେବ। ଏହି ମାମଲାର ଶୁଣାଣି ଦାୟିତ୍ୱ ଜଷ୍ଟିସ କୌଶିକ ଚନ୍ଦାଙ୍କୁ ଦିଆଯାଇଛି। ହେଲେ ମମତା ବାନାର୍ଜୀ ଜଷ୍ଟିସ କୌଶିକ ଚନ୍ଦାଙ୍କ ନିରପେକ୍ଷତାକୁ ନେଇ ପ୍ରଶ୍ନ ଉଠାଇଛନ୍ତି। ତେଣୁ ମାମଲା ଶୁଣାଣି ଅନ୍ୟ ଜଣେ ଜଜ୍ଙ୍କ ଦ୍ୱାରା କରାଇବାକୁ ହାଇକୋର୍ଟଙ୍କ ମୁଖ୍ୟ ବିଚାରପତିଙ୍କୁ ଚିଠି ଲେଖିଛନ୍ତି। ତାଙ୍କ ଓକିଲ ବିଚାରପତିଙ୍କ କାହିଁକି ବଦଳାଇବା ଉଚିତ, ସେଥିପାଇଁ ଦୁଇଟି କାରଣ କହିଛନ୍ତି। ପ୍ରଥମ କାରଣ ହେଉଛି ଯେ ଜଷ୍ଟିସ ଚନ୍ଦା ପୂର୍ବରୁ ବିଜେପି ସହ ଜଡିତ ଥିବା ରିପୋର୍ଟ ମିଳିଛି। ବିଜେପି ନେତାଙ୍କ ବୈଠକରେ ସେ ସାମିଲ ହୋଇଥିବା ବେଳର ଫଟୋ ସାମ୍ନାକୁ ଆସିଛି। ତେଣୁ ମାମଲାର ଶୁଣାଣି ବେଳେ ପକ୍ଷପାତିତାର ଆଶଙ୍କା ରହିଛି। ଯାହା ବିରୋଧରେ ଆବେଦନ କରାଯାଇଛି, ତାଙ୍କ ସପକ୍ଷରେ ଏହା ଯିବାର ଯଥେଷ୍ଟ ସମ୍ଭାବନା ରହିଛି। ଦ୍ୱିତୀୟ କାରଣ ହେଉଛି, ଏପ୍ରିଲ ମାସରେ କ୍ୟାଲକାଟା ହାଇକୋର୍ଟର ସ୍ଥାୟୀ ବିଚାରପତି ଭାବରେ ଜଷ୍ଟିସ୍ ଚନ୍ଦାଙ୍କ ନିଯୁକ୍ତକୁ ବିରୋଧ କରାଯାଇଥିଲା। ଏପରି ସ୍ଥିତିରେ ସେ ମାମଲାର ଶୁଣାଣି କରିବା ଠିକ ହେବନାହିଁ। ନ୍ୟାୟ କେବଳ ମିଳିଲେ ହେବନି, ଏହା ସମସ୍ତଙ୍କୁ ଦୃଶ୍ୟମାନ ହେବା ଉଚିତ। ଜନସାଧାରଣଙ୍କ ଆତ୍ମବିଶ୍ୱାସ ବଜାୟ ରଖିବାର ଆବଶ୍ୟକତା ନ୍ୟାୟପାଳିକାର ଦାୟିତ୍ୱ। ତେଣୁ ଏହା ଉପରେ କୋର୍ଟ ଧ୍ୟାନ ଦେବା ଦରକାର ବୋଲି ମମତାଙ୍କ ଓକିଲ ଚିଠିରେ ଲେଖିଛନ୍ତି। ଟିଏମସି ସାଂସଦ ଡେରେକ ଓ’ବ୍ରାଇନ୍ ମଧ୍ୟ ଦୁଇଟି ଫଟୋ ଟ୍ୱିଟ୍ କରିଛନ୍ତି। ଯେଉଁଥିରେ ଜଷ୍ଟିସ୍ ଚନ୍ଦା ବିଜେପିର ଆଇନ ଓ ଆଇନ ବ୍ୟାପାର ବିଭାଗର ବୈଠକରେ ଯୋଗ ଦେଇଛନ୍ତି। ସେ କହିଛନ୍ତି, “ଉଭୟ ଫଟୋରେ ସର୍କଲ ମଧ୍ୟରେ ଥିବା ଏହି ବ୍ୟକ୍ତି ଜଣଙ୍କ କିଏ? ସେ କ୍ୟାଲକାଟା ହାଇକୋର୍ଟର ଜଷ୍ଟିସ କୌଶିକ ଚନ୍ଦା କି? କ’ଣ ନନ୍ଦିଗ୍ରାମ ନିର୍ବାଚନ ମାମଲାର ଶୁଣାଣିତ ଦାୟିତ୍ୱ ତାଙ୍କୁ ଦିଆଯାଇଛି? କ’ଣ ନ୍ୟାୟପାଳିକା ଆହୁରି ତଳକୁ ଖସି ପାରିବ କି?” ଶୁକ୍ରବାର ଜଷ୍ଟିସ କୌଶିକ ମମତାଙ୍କ ଆବେଦନର ଶୁଣାଣି କରି ଏହାକୁ ୨୪ ତାରିଖ ଯାଏ ଘୁଞ୍ଚାଇ ଦେଇଛନ୍ତି।
