ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଆସନ୍ତାକାଲି ଶିବ ବିବାହ। ସମ୍ବଲପୁରର ଐତିହାସିକ ଶୀତଳ ଷଷ୍ଠୀ ଯାତ୍ରାର ବହୁ ପ୍ରତୀକ୍ଷିତ ମୁହୂର୍ତ୍ତ । ଗତକାଲି ରାତିରେ ବିଭିନ୍ନ ପଡା ମାନଙ୍କରେ ନିର୍ବନ୍ଧ କାର୍ଯ୍ୟ ପତରପେଣ୍ଡି ସମ୍ପନ୍ନ ହୋଇ ସାରିଛି। ଆଜି ସଂଧ୍ୟାରେ ହେବ ଦେବ ନିମନ୍ତ୍ରଣ କାର୍ଯ୍ୟ । ଗୁଆଗୁଣ୍ଡା ହନୁମାନ ମହାପ୍ରଭୁ , ହନୁମାନ ନିଉତାରେ ବାହାରି ଦେବ ଦମ୍ପତିଙ୍କ ବିବାହ ଉତ୍ସବରେ ଯୋଗ ଦେବା ପାଇଁ ସହରର ବିଭିନ୍ନ ଦେବାଦେବୀଙ୍କୁ ନିମନ୍ତ୍ରଣ କରିବେ। ତେବେ ଚଳିତ ବର୍ଷ କୋଭିଡ କଟକଣାକୁ ଦୃଷ୍ଟିରେ ରଖି ନିରାଡମ୍ବର ଭାବେ ଅନୁଷ୍ଠିତ ହେଉଛି ଶିବ ବିବାହ ବା ଶୀତଳ ଷଷ୍ଠୀ। ଅନ୍ୟ ବର୍ଷ ମାନଙ୍କରେ ବାଜା-ଗଜା ସହ ବାହାରିଥାଏ ପତରପେଣ୍ଡି ଶୋଭାଯାତ୍ରା । ଆକର୍ଷଣୀୟ ଆଲୋକ ସଜ୍ଜା ସହ ନୃତ୍ୟଗୀତର ତାଳେ ତାଳେ ସୃଷ୍ଟି ହୋଇଥାଏ ଉତ୍ସବର ମାହୋଲ। କିନ୍ତୁ ଚଳିତ ବର୍ଷ କରୋନା କଟକଣା ପାଇଁ ଖୁବ ନିରାଡମ୍ବର ଭାବେ ପାଳନ କରାଯାଉଛି ଶୀତଳଷଷ୍ଠୀ। ତେବେଲୋକଙ୍କ ଉତ୍ସାହରେ କିନ୍ତୁ ଭଟ୍ଟା ପଡିନି। ହେଲେ ଅନ୍ୟ ବର୍ଷ ଭଳି ଏଥର ବିବାହ ଶୋଭାଯାତ୍ରା ବାହାରିବନି କିମ୍ବା ଦେବ ଦମ୍ପତିଙ୍କ ଯୁଗଳ ଦର୍ଶନ ଶୋଭାଯାତ୍ରା ବି ସହର ପରିକ୍ରମା କରିବନି। ବିବାହ ଓ ଯୁଗଳ ଦର୍ଶନ ଉଭୟ ମନ୍ଦିର ପରିସରରେହିଁ ହେବ । ସେଥିପାଇଁ ବିଭିନ୍ନ ଯାତ୍ରା କମିଟି ପକ୍ଷରୁ ପୂର୍ବରୁ ନିଷ୍ପତ୍ତି ହୋଇ ସାରିଛି। ଶ୍ରଦ୍ଧାଳୁ ମାନେ ବିଭିନ୍ନ ଶିବାଳୟକୁ ଯାଇ ଦେବ ଦମ୍ପତିଙ୍କ ବିବାହ ଓ ଯୁଗଳ ଦର୍ଶନ ଦେଖିପାରିବେ। ଏବେ ସମସ୍ତଙ୍କର ଅପେକ୍ଷା ସେହି ମହାର୍ଘ୍ୟ ମୁହୂର୍ତ୍ତକୁ। ଯେତେବେଳେ ବିବାହ ବେଦିରେ ଶିବ ଓ ଶକ୍ତି ଙ୍କର ମିଳନ ହେବ।
