ଗୁଣପୁର ସହରରେ ଚାଲିଛି ବାଲି ମାଫିଆ ମାନଙ୍କ ରାଜ୍ ;ଖବର ପ୍ରକାଶ କଲେ ମାରି ଦେବାକୁ ଧମକ ।
ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ସାରା ରାଜ୍ୟରେ ଯେଉଁ ବଂଶଧାରା ନଦୀର ନାମ ପ୍ରସିଦ୍ଧ ତା’ର କୂଳ ଏବେ ଦେଖିବାକୁ ମିଳୁନି । ବାଲି ମାଫିଆ ମାନେ ନଦୀର କୂଳ ଖାଇ ନିଜ ନିଜ ଜାଗାରେ ଡମ୍ପିଂ ୟାଡ଼ ଖୋଲି ବସିଛନ୍ତି। ଡ଼ମ୍ପିଂ ୟାଡ଼ ନିମନ୍ତେ ସରକାରଙ୍କ ପକ୍ଷରୁ କୌଣସି ନିର୍ଦ୍ଦେଶ ନଥିବା ସତ୍ତ୍ୱେ ବେଆଇନ୍ ବାଲି,ଇଟା,ପଥର, ମେଟାଲ୍ ଚିପ୍ସ ରଖି ଚଢ଼ା ଦରରେ ବିକ୍ରି କରି ବାଲି ମାଫିଆ ମାନେ ରାଜ୍ ଚଳାଉଛନ୍ତି। ତହସିଲଦାରଙ୍କୁ ଏନେଇ ଖବର ଦେବା ପରେ ରାଜସ୍ୱ ବିଭାଗ ପକ୍ଷରୁ ଚଢାଉ କରି ଟ୍ରାକ୍ଟର ମାଲିକଙ୍କ ଠାରୁ କେବଳ ଜରିମାନା ଆଦାୟ କରାଯାଉଛି ।
ଅତିରିକ୍ତ ତହସିଲଦାର୍ ଶ୍ରୀ କପିଳେଶ୍ୱର ତାଣ୍ଡି ଓ ଟାଉନ୍ ଆର୍.ଆଇ କେ.ମାଣିକାଣ୍ଠା ଦିର୍ଘ ଦିନ ହେବ ଳଗାତାର ଚଢାଉ କରି ଜରିମାନା ଆଦାୟ କରୁଥିଲେ ହେଁ ବାଲି ମାଫିଆ ମାନଙ୍କ ବିରୁଦ୍ଧରେ କୌଣସି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ପାରୁନାହିଁ। ଫଳରେ ବାଲି ଚୋରା ଚାଲାଣ ଉପରେ ରୋକ ଲଗାଯାଇ ପାରୁନି ବୋଲି ବୁଦ୍ଧି ଜୀବି ମାନେ ମତ ପ୍ରକାଶ କରିଛନ୍ତି । ଏ ସମ୍ପର୍କରେ ଆର୍.ଆଇ ମାଣିକାଣ୍ଠା ଙ୍କୁ ପଚାରିବାରୁ ଅଧିକାଂଶ ଗାଡି ମାଲିକ ନିଜକୁ ସାମ୍ବାଦିକ ଓ ରାଜ ନେତାର ପରିଚୟ ଦେଉଥିବା ପ୍ରକାଶ କରିଛନ୍ତି। ଗୁଣପୁର ର ବିଭିନ୍ନ ସରକାରୀ ଅନୁଷ୍ଠାନ ରେ କାର୍ଯ୍ୟରତ କେତେକ ବ୍ୟକ୍ତି ବିଶେଷ ମାନଙ୍କ ସହ ଅନେକ୍ ସାମ୍ବାଦିକ ଓ ରାଜ ନେତା ମାନେ ଟ୍ରାକ୍ଟର ଗୁଡିକ କିଣି ଆଣି ବାଲି ଚୋରା ଚାଲାଣ କରିବା ସହ ଏହି ଚୋରା କାରବାର ର କିଙ୍ଗ ପିନ୍ ପାଲଟି ଥିବା ଅଭିଯୋଗ ଉଠିଛି । ଏପରିକି ଏହି ମାଫିଆ ମାନଙ୍କ ବିରୁଦ୍ଧରେ ଖବର ପ୍ରକାଶ କରିଲେ ମାରି ଦିଆଯିବ ବୋଲି ଧମକ ମିଳୁଛି । ବର୍ଷ ତମାମ ବାଲି ଚୋରା ଚାଲାଣ କରି ବିକ୍ରି କରୁଥିବା ଓ ବିଭିନ୍ନ ସ୍ଥାନରେ ବାଲି ଗଛିତ ରଖି ଚଢା ଦରରେ ବିକ୍ରି କରୁଥିବା ମାଫିଆ ଓ ରାଜସ୍ଵ ବିଭାଗର ମଧୁଚନ୍ଦ୍ରିକା ଯୋଗୁଁ ପ୍ରକୃତ ବାଲି ମାଫିଆ ମାନେ ପଦାରେ ପଡୁ ନାହାଁନ୍ତି ବୋଲି କିଛି ଟ୍ରାକ୍ଟର ମାଲିକ ଅଭିଯୋଗ କରୁଛନ୍ତି ।
ଗୁଣପୁର ପୌର ପରିଷଦ ମଧ୍ୟର ରାମେଶ୍ଵର ନଗର୍ ଉପର ମୁଣ୍ଡରେ, କତାଲଗୁଡା, ଶାନ୍ତି ନଗର୍, ଲିମାମଡା, ବିକ୍ରମପୁର ବନ ବିଭାଗ ସମ୍ମୁଖ, ପୁରୁଣା ଗୁଣପୁର ଗୁଣ୍ଡିଚା ମନ୍ଦିର ଓ ଜଗନ୍ନାଥପୁର୍ ପଞ୍ଚାୟତ ର ବାସନାଗୁଡ଼ା ଠାରେ ରହିଥିବା ବାଲି ରେମ୍ପ ଗୁଡିକ ରାଜସ୍ୱ ବିଭାଗ ପକ୍ଷରୁ ଜବତ କରାଗଲେ ବାଲି ଚୋରା ଚାଲାଣ ପଛରେ କେଉଁ ମାନଙ୍କ ପ୍ରଚ୍ଛଦ ହାତ ରହିଛି ଏହା ଜଣାଯିବ ଏବଂ ଏଗୁଡିକ ନିଲାମ କରାଗଲେ ରାଜ୍ୟ ସରକାରଙ୍କୁ ବହୁଳ ପରିମାଣର ରାଜସ୍ୱ ମିଳି ପାରିବ । ରାଜସ୍ୱ ବିଭାଗର କର୍ମଚାରୀ ମାନଙ୍କ ସୂଚନା ଅନୁଯାୟୀ ନିର୍ଦ୍ଧିଷ୍ଟ ସମୟରେ ମାଫିଆ ମାନେ ଚୋରା ଚାଲାଣ କରିବା ଓ ଆଗୁଆ ସୂଚନା ପାଇ ଗାଡି ଚଳାଇବା ବନ୍ଦ କରି ଦେଉଚନ୍ତି ବୋଲି ଅଭଯୋଗ ଆସିଛି । ଏତତ୍ ସମ୍ପର୍କରେ ଜଣାଇବା ପରେ ଏହି ଘଟଣା ସମ୍ପର୍କରେ ତହସିଲଦାର୍ ଶ୍ରୀ. ଶରତ ଚନ୍ଦ୍ର ନାୟକ ଅତି ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି କହିଛନ୍ତି ।