ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – ଏସ୍ସିବିରୁ ଚମ୍ପଟ ମାରିଥିବା ଗ୍ୟାଙ୍ଗଷ୍ଟର ହାଇଦରକୁ ଧରିଲା କିଏ? କମିଶନରେଟ୍ ପୁଲିସ ନା ହାଇଦ୍ରାବାଦ ପୁଲିସ। ହାଇଦର ଧରାପଡ଼ିବା ପରେ ଉଭୟ ଓଡ଼ିଶା ଓ ତେଲେଙ୍ଗାନା ରାଜ୍ୟ ପକ୍ଷରୁ କରାଯାଉଥିବା ଦାବିକୁ ନେଇ ଉଠିଛି ସନ୍ଦେହ। ଆଜି ହାଇଦର ଧରାପଡ଼ିବା ନେଇ କଟକ-ଭୁବନେଶ୍ୱର ପୁଲିସ କମିଶନର ସାମ୍ୱାଦିକ ସମ୍ମିଳନୀ କରି ସ୍ପଷ୍ଟ କରିଥିଲେ। ପୁଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ କହିଥିଲେ-“ହାଇଦରକୁ ତେଲେଙ୍ଗାନାରୁ ଗିରଫ କରାଯାଇଛି। ଆଜି ସଂଧ୍ୟାରେ କଟକ ପୁଲିସ ତେଲେଙ୍ଗାନାରୁ ଧରିଛନ୍ତି। ତେଲେଙ୍ଗାନା ପୁଲିସ ସହାୟତାରେ ସଙ୍ଗାରେଡି ଜିଲ୍ଲାରୁ ଗିରଫ କରିଛି। ସେ ବାଇକ୍ରେ ଯିବା ବେଳେ ଆମ ଟିମ୍ ତାକୁ କାବୁ କରିଥିଲେ। ୨୪ ଘଣ୍ଟା ଭିତରେ ତାକୁ ଆଣି କୋର୍ଟରେ ହାଜର କରିବୁ।” ଏନେଇ ଡିଜିପି ଓଡ଼ିଶା ପକ୍ଷରୁ ଏକ ଟ୍ୱିଟ୍ କରାଯାଇଛି। ସେଥିରେ ପୁଲିସ କମିଶନର ଏସ୍.କେ ପ୍ରିୟଦର୍ଶୀଙ୍କୁ ପ୍ରଶଂସା କରାଯାଇଛି। ସେଥିରେ ଉଲ୍ଲେଖ ରହିଛି ଯେ, କମିଶନର ଏସ୍.କେ ପ୍ରିୟଦର୍ଶୀ ଓ କଟକ ଡିସିପି ପ୍ରତିକ ଜି ସିଂହଙ୍କ ନେତୃତ୍ୱରେ ଫେରାର ହାଇଦରକୁ ହାଇଦ୍ରାବାଦରୁ ଗିରଫ କରାଯାଇଛି। ସେପଟେ ହାଇଦ୍ରାବାଦ ସିଟି ପୁଲିସ୍ ପକ୍ଷରୁ ଏକ ଟ୍ୱଟ୍ କରାଯାଇଛି। ସେଥିରେ ଉଲ୍ଲେଖ କରାଯାଇଛି ଯେ, ଓଡ଼ିଶାରୁ ଫେରାର ଥିବା ଅପରାଧୀ ହାଇଦରକୁ ହାଇଦ୍ରାବାଦ ପୁଲିସ ଦ୍ୱାରା ଗିରଫ କରାଯାଇଛି। ୬୦ ବର୍ଷୀୟ ଜଘନ୍ୟା ଅପରାଧୀ ହାଇଦରକୁ ହାଇଦ୍ରାବାଦ ପୁଲିସ ଧରିବାରେ ସକ୍ଷମ ହୋଇଥିଲା। ସମ୍ପୃକ୍ତ ଅପରାଧୀ ରଶ୍ମୀରଞ୍ଜନ ମହାପାତ୍ର ହତ୍ୟା ଅଭିଯୁକ୍ତ ବୋଲି ଟ୍ୱିଟ୍ରେ ଉଲ୍ଲେଖ କରାଯାଇଛି।ଏବେ ପ୍ରଶ୍ନ ଉଠୁଛୁ ହାଇଦରକୁ ଧରିଲା କିଏ? କାରଣ ଏସ୍ସିବିରୁ ଫେରାର ହେବା ପରେ ହାଇଦରକୁ ଧରିବା ପାଇଁ ଓଡ଼ିଶା ପୁଲିସ ଜୋରଦାର ଉଦ୍ୟମ ଆରମ୍ଭ କରିଥିଲା। ଯଦି ଓଡ଼ିଶା ପୁଲିସ ହାଇଦରକୁ ଧରିବାରେ ସଫଳ ହୋଇଛି, ତାକୁ ତେଲେଙ୍ଗାନା ପୁଲିସ ଶ୍ରେୟ ଦେବାକୁ ଚାହୁଁନାହିଁ କି ?
