ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର) – କରୋନା ମହାମାରୀ ସଂକ୍ରମଣ ଆଶଙ୍କାରେ ରାଜ୍ୟବ୍ୟାପୀ ଲକଡାଉନ୍ ଚଳିତମାସ ୧୭ତାରିଖ ପର୍ଯ୍ୟନ୍ତ ରହିଥିବାବେଳେ ସରକାର ବର୍ତ୍ତମାନ ସ୍ଥିତିର ବାରମ୍ବାର ସମୀକ୍ଷା କରୁଛନ୍ତି ଏବଂ ପରିସ୍ଥିତିକୁ ଆକଳନ କରି ନିଷ୍ପତ୍ତି ନିଆଯିବ ବୋଲି ରାଜ୍ୟ ଡିଏମଇଟି ସିବିକେ ମହାନ୍ତି କହିଛନ୍ତି। ରାଜ୍ୟରେ ଅନଲକ୍ ପ୍ରକ୍ରିୟା ଆରମ୍ଭ ହେବା ନେଇ ଗଣମାଧ୍ୟମକୁ ପ୍ରତିକ୍ରିୟା ଦେଇ ଡାକ୍ତର ମହାନ୍ତି କହିଛନ୍ତି ଯେ, ପରିସ୍ଥିତିକୁ ଦୃଷ୍ଟିରେ ରଖି ସରକାର ଅନଲକ୍ ପ୍ରକ୍ରିୟାକୁ ଯିବେ । ଜାତୀୟ ଟ୍ୟାସ୍କ ଫୋର୍ସ ଓ ଡବ୍ଲ୍ୟୁଏଚଓ ଗାଇଡଲାଇନକୁ ଅନୁଶୀଳନ କରାଯାଉଛି। ଏହାସହିତ ବିଭିନ୍ନ ବିଶ୍ୱସ୍ତରୀୟ ସଂସ୍ଥା ଓ ଜାତୀୟ ସ୍ତରୀୟ ସଂସ୍ଥା ବିଶେଷଜ୍ଞମାନଙ୍କର ମତାମତ ନେଇ ଅନଲକ୍ ପ୍ରକ୍ରିୟା ଆରମ୍ଭ କରାଯିବ। ଏ ଦିଗରେ ବାରମ୍ବାର ସମୀକ୍ଷା ଚାଲିଛି ଓ ପରିସ୍ଥିତି ଆକଳନ କରି ନିଷ୍ପତ୍ତି ନିଆଯିବ। ରାଜ୍ୟରେ ଏବେ ପଜିଟିଭ ହାର ଦ୍ରୁତଗତିରେ କମିବାରେ ଲାଗିଛି। ଏବେ ପଜେଟିଭ ହାର ୬%କୁ ଖସି ଆସିଛି, ଯାହା ଆଶ୍ୱସ୍ତିର କଥା । ଏକମୋ ଚିକିତ୍ସା ପାଇଁ ୬ଟି ମେସିନ୍ ଆଣିବାକୁ ଟେଣ୍ଡର ସରିଛି । ଆବଶ୍ୟକ ମାନବ ସମ୍ବଳ ପ୍ରସ୍ତୁତ ହୋଇସାରିଛନ୍ତି । ମେସିନ୍ ଆସିଲେ ଏକମୋ ଚିକିତ୍ସା ଆରମ୍ଭ ହେବ। କଟକସ୍ଥିତି ଏସସିବି ମେଡିକାଲ କଲେଜରେ ୬ଟି ୟୁନିଟ୍ ଖୋଲାଯିବ। ରାଜ୍ୟରେ ଏବେ ୨ଟି ଘରୋଇ ହସ୍ପିଟାଲରେ ଏକମୋ ମେସିନ୍ ରହିଛି ବୋଲି ଡାକ୍ତର ମହାନ୍ତି କହିଛନ୍ତି।
