ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – କେନ୍ଦ୍ର ସରକାରଙ୍କ ୨୦ ହଜାର କୋଟି ଟଙ୍କାର ଡ୍ରିମ ପ୍ରୋଜେକ୍ଟ ସେଣ୍ଟ୍ରାଲ ଭିସ୍ତାକୁ ପୂରଣ କରିବା ପାଇଁ ଦିଲ୍ଲୀର ୩ଟି ଐତିହାସିକ କୋଠା ଭଙ୍ଗାଯିବ। ଭଙ୍ଗାଯିବାକୁ ଏହି ୩ କୋଠା ହେଲା- ଜାତୀୟ ସଂଗ୍ରାହଳୟ, ଇନ୍ଦିରା ଗାନ୍ଧି ନ୍ୟାଶନାଲ ସେଣ୍ଟର ଫର ଆର୍ଟସ (ଆଇଜିଏନସିଏ) ଏବଂ ନ୍ୟାଶନାଲ ଆରକ୍ରାଇଭ୍ସ ଆନେକ୍ସ-ଏମ୍ବଲମେଟିକ ଅଫ ହିଷ୍ଟ୍ରୀ ଓ କଲଚର। ସେଣ୍ଟ୍ରାଲ ଭିସ୍ତା ପ୍ରକଳ୍ପରେ ନୂଆ ସଂସଦ ଭବନ, ପ୍ରଧାନମନ୍ତ୍ରୀ ଓ ଉପ ରାଷ୍ଟ୍ରପତିଙ୍କ ନୂଆ ବାସଭବନ ତିଆରି କରାଯାଉଛି। ଏହି ୩ ବିଲଡିଂ ବ୍ୟତୀତ ସେଣ୍ଟ୍ରାଲ ଭିସ୍ତା ପ୍ରୋଜେକ୍ଟ ପାଇଁ ଭଙ୍ଗା ଯିବାକୁ ଥିବା ଅନ୍ୟ କୋଠା ଗୁଡ଼ିକ ହେଲା ଶାସ୍ତ୍ରୀ ଭବନ, କୃଷି ଭବନ, ବିଜ୍ଞାନ ଭବନ, ଉପ ରାଷ୍ଟ୍ରପତିଙ୍କ ବାସଭବନ, ଜବାହର ଭବନ, ନିର୍ମାଣ ଭବନ, ଉଦ୍ୟୋଗ ଭବନ ଓ ରକ୍ଷା ଭବନ। ମୋଟ ଉପରେ ୪,୫୮,୮୨୦ ବର୍ଗ ମିଟର ଅଞ୍ଚଳକୁ ସେଣ୍ଟ୍ରାଲ ଭିସ୍ତା ପ୍ରକଳ୍ପକୁ ଶେଷ କରିବା ପାଇଁ ଭଙ୍ଗାଯିବ। ଜାତୀୟ ସଂଗ୍ରାହଳୟରେ ଅନେକ ପୁରୁଣା ପ୍ରତିମୂର୍ତ୍ତି ଠାରୁ ଆରମ୍ଭ କରି ପ୍ରାଇସଲେସ କଏନ, ପେଣ୍ଟିଂ, ଅଳଙ୍କାର ଓ ଭାରତୀୟ ସଂସ୍କୃତି ଏବଂ ପରମ୍ପରା ସହ ଜଡ଼ିତ ଅନେକ ଜିନିଷ ସଂରକ୍ଷିତ ହୋଇ ରହିଛି। ଏହି ସବୁ ଜିନିଷ ଗୁଡ଼ିକୁ ଉତ୍ତର କିମ୍ବା ଦକ୍ଷିଣ ବ୍ଲକକୁ ସ୍ଥାନାନ୍ତର ହେବ। ନ୍ୟାଶନାଲ ଆରକ୍ରାଇଭ୍ସର ମୁଖ୍ୟ ବିଲଡିଂ ଭଙ୍ଗା ଯିବନି। କିନ୍ତୁ ଆନେକ୍ସ ବିଲଡିଂକୁ ଭଙ୍ଗା ଯାଇ ନୂଆ କରି ନିର୍ମାଣ କରାଯିବ। ଏହି ଆରକ୍ରାଇଭ୍ସରେ ୪୫ ଲକ୍ଷ ଫାଇଲ, ୨୫,୦୦୦ ବିରଳ ମନୁସ୍କ୍ରିପ୍ଟି, ୧ ଲକ୍ଷରୁ ଅଧିକ ମ୍ୟାପ୍ ଓ ୧.୩ ଲକ୍ଷ ମୋଗଲ ଦସ୍ତାବିଜ୍ ରହିଛି। ସେଣ୍ଟ୍ରାଲ ଭିସ୍ତା ପାଇଁ ଐତିହାସିକ ବିଲଡିଂ ସବୁ ଭଙ୍ଗା ଯାଉଥିବାରୁ ଏହାକୁ ଅନେକ ବୁଦ୍ଧିଜୀବୀ ନାପସନ୍ଦ କରିଛନ୍ତି।
ସେଣ୍ଟ୍ରାଲ ଭିସ୍ତା ପ୍ରକଳ୍ପ ପାଇଁ ଭଙ୍ଗା ହେବ ୩ ଐତିହାସିକ କୋଠା..!
