ଏଥର ସମ୍ଭାଳ ବ୍ୟୁରୋ (ମୟୂରଭଞ୍ଜ) – ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମନ୍ତ୍ରୀ ମଣ୍ଡଳରେ ସାମିଲଥିବା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉପରେ ସଙ୍ଗୀନ ଆରୋପ ଆଣିଛନ୍ତି ମୟୂରଭଞ୍ଜ ଲୋକସଭା ସାଂସଦ ଇଂ. ରାମଚନ୍ଦ୍ର ହାଁସଦାଃ । କେନ୍ଦ୍ର ସରକାର ତାଙ୍କ ବିରୋଧରେ ଚକ୍ରାନ୍ତ କରି ସିବିଆଇ ଲଗାଇ ମାମଲା ରୁଜୁ କରିଛି ଏବଂ ତାଙ୍କ ବିରୋଧରେ ହୋଇଥିବା ଚିଟଫଣ୍ଡ ମାମଲା ଆଦାଲତରେ ବିଚାରାଧୀନ ରହିଛି । ସିବିଆଇ ଜାଣିଶୁଣି ମାମଲାର ବିଚାରକୁ ଶୀଘ୍ର କରାଇ ଦେଉନାହିଁ । ବିଚାର ବ୍ୟବସ୍ଥା ପ୍ରତି ଯଥେଷ୍ଟ ସମ୍ମାନ ଓ ବିଶ୍ୱାସ ରହିଛି । ଯେତେ ପର୍ଯ୍ୟନ୍ତ ଆଦାଲତ ଦ୍ୱାରା ଦୋଷୀ ସାବ୍ୟସ୍ତ ହୋଇ ନାହାନ୍ତି, ସେତେପର୍ଯ୍ୟନ୍ତ ତାଙ୍କୁ ଦୋଷୀ ବୋଲି କୁହାଯାଇ ପାରିବ ନାହିଁ । କିନ୍ତୁ, କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବାରିପଦା ପୁଲିସ ହାଇ ସ୍କୁଲ ପଡ଼ିଆରେ ପ୍ରଧାନମନ୍ତ୍ରୀ ମୋଦୀଙ୍କ ଲୋକାର୍ପଣ ସମାରୋହରେ ସାଂସଦ ଶ୍ରୀହାଁସଦାଃଙ୍କ ଉପସ୍ଥିତିରେ ଦୁର୍ନୀତି ଗ୍ରସ୍ତ ସାଂସଦ ଭାବେ ଚିତ୍ରଣ କରିବା ସଂଗେସଂଗେ ଓଡ଼ିଶାର ମାନ୍ୟବର ମୁଖ୍ୟମନ୍ତ୍ରୀ ନବୀନଙ୍କ ପ୍ରତି ମଧ୍ୟ କଟୁ ଶବ୍ଦ ପ୍ରୟୋଗକରିଥିଲେ ; ଯାହା ତାଙ୍କର ସ୍ୱାଭିମାନ, ସମ୍ମାନ, ପଦମର୍ଯ୍ୟାଦାକୁ ହାନୀ ପହଁଞ୍ଚାଇଛି । ଯାହା ଜଣେ ଦାୟିତ୍ୱ ସମ୍ପନ୍ନ ସାଂସଦ ତଥା ମନ୍ତ୍ରୀଙ୍କ ନିକଟରୁ ଆଶା କରାଯାଏ ନାହିଁ । ସାଂସଦ ଇଂ. ହାଁସଦାଃ ଜଣେ ଆଦିବାସୀ ନେତା ବୋଲି ମନ୍ତ୍ରୀ ଶ୍ରୀପ୍ରଧାନ ଭଲ ଭାବେ ଜାଣିଛନ୍ତି । ତାଙ୍କର ଆକ୍ଷେପ ସହ୍ୟ କରିବାର ସମସ୍ତ ସୀମାକୁ ଆତିକ୍ରାନ୍ତ କରିସାରିଛି । ଏଥି ସହିତ ଆର୍ଥିକ ସ୍ୱଚ୍ଛଳ, ଲିଗାଲ ଆଡ଼ଭାଇଜର ଇତ୍ୟାଦି ନ ଥିବାର ସୁଯୋଗ ନେଇ ଆକ୍ଷେପ କରିଆସୁଛନ୍ତି ବୋଲି ମୟୂରଭଞ୍ଜ ଲୋକସଭା ସାଂସଦ ଇଂ. ଶ୍ରୀହାଁସଦାଃ ରବିବାର ବାରିପଦା ସ୍ୱସ୍ତିକ ହୋଟେଲ ସମ୍ମିଳନୀ କକ୍ଷରେ ଆୟୋଜିତ ସାମ୍ବାଦିକ ସମ୍ମିଳନୀରେ ଉପସ୍ଥିତ ଗଣମାଧ୍ୟମର ପ୍ରତିନିଧିମାନଙ୍କୁ ସୂଚନା ଦେଇଥିଲେ । ଏଥି ସହିତ ସାଂସଦ ଇଂ. ହାଁସଦାଃ ଏହା ବିରୋଧରେ ଅଦାଲତର ଦ୍ୱାର ଖଟଖଟାଇବେ ବୋଲି ସାମ୍ବାଦିକ ସମ୍ମିଳନୀରେ ପ୍ରକାଶ କରିଥିଲେ । ଏହି ସମୟରେ ଅନ୍ୟମାନଙ୍କ ମଧ୍ୟରେ ରାଇରଙ୍ଗପୁର ବାର ଆସୋସିଏସନର ସଭାପତି ତଥା ସାଂସଦ ଶ୍ରୀହାଁସଦାଃଙ୍କ ଆଇନ ପରାମର୍ଶଦାତା ଅକ୍ଷୟ ମହାନ୍ତି ଓ ଦେବାଶିଷ ମିଶ୍ର ପ୍ରମୁଖ ମଞ୍ଚାସୀନ ରହିଥିଲେ ।
ବିଜେପି ନେତାଙ୍କ ଆକ୍ଷେପର ଶିକାର ପାଲଟିଛନ୍ତି ଆଦିବାସୀ ନେତା ସାଂସଦ ରାମଚନ୍ଦ୍ର !
