ପିଇଦେଲେ କଥା ସରିଲା; ନକଲି ମୃଦୁ ପାନୀୟ କିଣିବା ବେଳକୁ ସାବଧାନ …!

ଏଥର ସମ୍ଭାଳ ବ୍ୟୁରୋ (ଭୁବନେଶ୍ୱର)- ଆଗକୁ ଖରାଦିନ । ଗରମରେ ଥଣ୍ଡା ଥଣ୍ଡା କୋଲ୍ଡ ଡ୍ରିଙ୍କସ ପିଇବାକୁ ସମସ୍ତଙ୍କ ଇଛା । ହେଲେ ମୃଦୁ ପାନୀୟ କିଣିବା ବେଳକୁ ଆପଣଙ୍କୁ ଟିକେ ସଜାଗ ରହିବାକୁ ପଡିବ । ବୋତଲରେ ଲେଖାଯାଇଥିବା ନାଁକୁ ଟିକେ ଭଲଭାବରେ ପଢିବାକୁ ପଡିବ । ଯଦି ଆଖି ଧୋକାଖାଇଯାଏ । ତେବେ କଥା ସରିଲା ।  କାରଣ ବଜାରରେ ବୁଲୁଛି ମାଳମାଳ ଡୁପ୍ଳିକେଟ୍ କୋଲ୍ଡ ଡ୍ରିଙ୍କସ ।  ଯାହା ସ୍ୱାସ୍ଥ୍ୟ ପ୍ରତି ବେଶ୍ ହାନୀକାରକ।  ଭୁବନେଶ୍ୱରର ମଞ୍ଚେଶ୍ୱର ଶିଳ୍ପାଞ୍ଚଳରେ ଚଢାଉ କରି ଏଭଳି ଏକ ନକଲି ମୃତୁ ପାନୀୟ କାରଖାନାକୁ ସିଲ୍ କରିଛି ପୋଲିସ ଓ ବିଏମ୍ସିର ଟିମ୍। ଭୁବନେଶ୍ୱର ମଞ୍ଚେଶ୍ୱର ଶିଳ୍ପାଞ୍ଚଳରେ ବର୍ଷ ବର୍ଷ ଧରି ବେଧଡକ ଚାଲିଥିଲା ବେପାର ।  ପୁଲିସର ନାକ ତଳେ ଏବଂ ସମସ୍ତଙ୍କ ଆଖି ସାମ୍ନାରେ ହେଉଥିଲା ଦୁଇ ନମ୍ବରି କାରବାର। ଚାରି ପାଞ୍ଚ ପ୍ରକାରର ମୃଦୁ ପାନୀୟ, ଜୁସ୍ ଏବଂ ମସାଲା ଡ୍ରିଙ୍କସ ପ୍ରସ୍ତୁତ କରାଯାଉଥିଲା । ହେଲେ କେଉଁ ଉତ୍ପାଦ କେତେ ପରିମାଣରେ ମିଶାଯିବ ଏବଂ ଶରୀର ଉପରେ ତାର କଣ ପ୍ରଭାବ ରହିବ, ତାର ଯାଂଚ ପାଇଁ ଏଠାରେ ନା ଲାବ୍ରୋଟାରୀ ଥିଲା ନା ଟେକ୍ନିସିଆନ୍ ଥିଲେ । ବଜାରରେ ବିକ୍ରି ହେଉଥିବା ବଡ ବଡ ବ୍ରାଣ୍ଡ ଭଳି ସମାନ ବୋତଲରେ ନକଲି ଲେବୁଲ ଲଗାଇ ଅପମିଶ୍ରିତ ମୃଦୁ ପାନୀୟ ତିଆରି ହେଉଥିଲା ।  ଏହାପରେ ଗାଁ ଗହଳିରେ ବିକ୍ରି ପାଇଁ ବେଶ୍ ଆରାମରେ ପଠାଇ ଦିଆଯାଉଥିଲା। ଚିନ୍ତାଜନକ କଥା ହେଉଛି, କାରଖାନାରେ ତିଆରି ହେଉଥିବା ନକଲି ମୃଦୁ ପାନୀୟରେ ସୋ଼ଡିଅମ୍ ବେଞ୍ଜୋଟ୍ ଏବଂ ସାଇଟ୍ରିକ ଏସିଡ୍ ଭଳି କେମିକାଲ ମିଶାଯାଉଥିଲା।  ଯାହାର ପରିମାଣ ସଠିକ ନରହିଲେ ସ୍ୱାସ୍ଥ୍ୟ ପ୍ରତି ହାନିକାରକ ହୋଇପାରେ ।