!!! ବଲାଙ୍ଗୀର ରୁ ଜିଲ୍ଲା ପ୍ରତିନିଧି ଦିଲ୍ଲୀପ ମେହର ଙ୍କ ରିପୋର୍ଟ୍ !!!
ଏଥର ସମ୍ଭାଳ (ସିନ୍ଧେକେଲା/ବଲାଙ୍ଗିର ) – ବିଭିନ୍ନ ପ୍ରକାର ତନ୍ତ୍ର ମନ୍ତ୍ର ଓ ଗୁଣିଗାରେଡିରେ ବିଶ୍ୱାସ କରି ବଲାଙ୍ଗୀର ଜିଲ୍ଲାର ବିଭିନ୍ନ ଥାନା ଅଞ୍ଚଳରେ ହତ୍ୟାକାଣ୍ଡ ତଥା ଅପରାଧ ବଢ଼ୁଥିବାରୁ ଏ ଦିଗରେ ଜନଚେତନା ସୃଷ୍ଟି କରିବାପାଇଁ ହେତୁବାଦୀ ମାନେ ଆହ୍ୱାନ ଦେଇଛନ୍ତି | ସିନ୍ଧେକେଲା ଥାନାର ଭାରପ୍ରାପ୍ତ ଅଧିକାରୀ ବି. ରୁଦ୍ରେୟାଙ୍କ ଉଦ୍ୟମ କ୍ରମେ ଆଜି ପଲ୍ଲିଶ୍ରୀ ହାୟର ସେକେଣ୍ଡାରୀ ସ୍କୁଲ ଠାରେ ଅଲୌକିକତା ଅନାବରଣ କାର୍ଯ୍ୟକ୍ରମ ଏବଂ କର୍ମଶାଳା ଉଦଘାଟନ କରି ଶ୍ରୀ ରୁଦ୍ରେୟା କହିଥିଲେ ଯେ, ବିଦ୍ୟାଳୟ ସ୍ତରରୁ ଏ ଦିଗରେ ସଚେତନତା ସୃଷ୍ଟି କରାଗଲେ ଅବୈଜ୍ଞାନିକ ବିଶ୍ୱାସଜନିତ ଅନେକ ଦୁଃଖଦାୟକ ହତ୍ୟାକାଣ୍ଡ ଓ ଅପରାଧର ଚାପରୁ ପୋଲିସ ବିଭାଗ, ବିଚାର ବିଭାଗ, ସ୍ୱାସ୍ଥ୍ୟ ବିଭାଗ, ସ୍ଥାନୀୟ ପ୍ରଶାସନ ଆଦି ବିଭାଗକୁ ମୂଲ୍ୟବାନ ସମୟ ଅପଚୟରୁ ରୋକା ଯାଇପାରିବ | ମନସ୍ତତ୍ଵବିତ୍ତ ପ୍ରଫେସର ଡ. ପ୍ରତାପ କୁମାର ରଥ, ଭାରତୀୟ ସମ୍ବିଧାନର ମୁଖବନ୍ଧ ଉପରେ ଆଲୋକପାତ କରି ପ୍ରତ୍ୟେକ ଭାରତୀୟ ନାଗରିକର ଦାୟିତ୍ୱ ଓ କର୍ତ୍ତବ୍ୟ ଉପରେ ଆଲୋଚନା କରିଥିଲେ | ଏହି ପରିପ୍ରେକ୍ଷୀରେ ଧାରା 51(କ) (ଜ) ଉପରେ ଆଲୋକପାତ କରି ଅନୁସନ୍ଧିତ୍ସୁ ମନୋଭାବ ଛାତ୍ରଛାତ୍ରୀ ମାନଙ୍କ ଠାରେ ସୃଷ୍ଟି କରାଗଲେ ଅବୈଜ୍ଞାନିକ ଅବଧାରଣା ସମାଜରୁ ଦୂର ହୋଇପାରିବ ବୋଲି ମତ ବ୍ୟକ୍ତ କରିଛନ୍ତି | ଏହି ଅବସରରେ ହେତୁବାଦୀ ସୁଧାଂଶୁ ଶେଖର ଧଡ଼ା ଅଲୌକିକତା ନାମରେ ବିଶ୍ୱାସ କରାଯାଉଥିବା ଅନେକ ଅବାଧରଣାର ପ୍ରଦର୍ଶନ ସହିତ ରହସ୍ୟ ଉନ୍ନ୍ମୋଚନ ଓ ଏହା ପଛରେ ଥିବା ଧୋକାବାଜିର ବିଶ୍ଳେଷଣ କରିଥିଲେ | ଶ୍ରୀ ଧଡ଼ା ଆହୁରି ମଧ୍ୟ କହିଥିଲେ ଯେ, ପ୍ରଶ୍ନ ପଚାରିବାର ମନୋବୃତ୍ତି ସୃଷ୍ଟି କରିବା ଏବଂ ବିଚାରଶକ୍ତିର ପ୍ରୟୋଗ କରିବା ଦ୍ୱାରା ଅଲୌକିକତା ନାମରେ ବିଶେଷଭାବେ ମହିଳା ଏବଂ ଝିଅ ମାନଙ୍କୁ ଶୋଷଣରୁ ସୁରକ୍ଷା ଦିଆଯାଇପାରିବ | ଏହି କାର୍ଯ୍ୟକ୍ରମ ଅବସରରେ ପୂର୍ବରୁ ସିନ୍ଧେକେଲା ଥାନା ପକ୍ଷରୁ ଆୟୋଜନ କରାଯାଇଥିବା ସମାଜସେବା କାର୍ଯ୍ୟରେ ଅଂଶଗ୍ରହଣକାରୀ ମାନଙ୍କୁ ମାନପତ୍ର ପ୍ରଦାନ କରାଯାଇଥିଲା | ଏହି କାର୍ଯ୍ୟକ୍ରମରେ ଶିକ୍ଷାନୁଷ୍ଠାନର ଅଧ୍ୟକ୍ଷ ପ୍ରମୋଦ କୁମାର ରଥ, ପଞ୍ଚାୟତ ଉପ ଅଧ୍ୟକ୍ଷ ଭୋଳା ବେହେରା, ସରପଞ୍ଚ ନରେଶ ଅଗ୍ରୱାଲ, ଦାଶରଥୀ ସାହୁ, ସଂଯୁକ୍ତା ବାରିକ, କୈବର୍ତ୍ତ ନାଗ, ଯମୁନା ରଣା, ଗୀତା ବେହେରା, ସୁଶୀଳା ସାହୁ, ଜ୍ୟୋତିର୍ମୟୀ ସାହୁ, ସୁଜିତ ସାହୁ, ମୋହନ ସାହୁ ପ୍ରମୁଖ ଅଧ୍ୟାପକ ସହ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ |