ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ମାଗଣା ବଣ୍ଟନକୁ କେନ୍ଦ୍ର ବିରୋଧ କରିଆସୁଥିବା ବେଳେ ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆପ ଆବାହକ ଅରବିନ୍ଦ କେଜ୍ରିୱାଲ ଏହାର ପାଲଟା ଜବାବ ଦେଇଛନ୍ତି। କେନ୍ଦ୍ରକୁ ଟାର୍ଗେଟ କରି କେଜ୍ରିୱାଲ କହିଛନ୍ତି ଯେ, ସରକାର କର୍ପୋରେଟଙ୍କ ଫାଇଦାରେ ଅଛନ୍ତି। ଦେଶର ସୁପର ଧନୀମାନଙ୍କର ୧୦ ଲକ୍ଷ କୋଟି ଟଙ୍କା ଋଣ ଏବଂ ୫ ଲକ୍ଷ କୋଟି ଟଙ୍କାର ଟ୍ୟାକ୍ସ ଛାଡ଼ କରିଛନ୍ତି। କିନ୍ତୁ ଗରିବମାନଙ୍କ ଉପରେ ଟ୍ୟାକ୍ସ ଭିଡ଼ୁଛନ୍ତି। ଏପରିକି ଗରିବରୁ ଅତି ଗରିବ ଶ୍ରେଣୀର ଲୋକେ ମଧ୍ୟ ଟ୍ୟାକ୍ସ ଦେଉଛନ୍ତି। ଯେତେବେଳେ ସେମାନେ ଚାଉଳ କିମ୍ବା ଗହମ କିଣୁଛନ୍ତି ସେମାନଙ୍କୁ ଟ୍ୟାକ୍ସ ଦେବାକୁ ପଡ଼ୁଛି। କେନ୍ଦର ଏମିତି କଣ ସ୍ଥିତିରେ ପହଞ୍ଚିଛି ଯେ, ଗରିବରୁ ଅତି ଗରିବ ଶ୍ରେଣୀର ଲୋକଙ୍କ ଉପରେ ଟ୍ୟାକ୍ସ ଲଗାଉଛି। ସେହିପରି ଫୁଡ୍ ଆଇଟମରେ ଟ୍ୟାକ୍ସ ଲାଗିବା, ଏମଜିଏନଆଇଜିଏ ଫଣ୍ଡରେ ୨୫ ପ୍ରତିଶତ ଅର୍ଥ ପ୍ରତ୍ୟାହାର କରିବାକୁ ନେଇ କେଜ୍ରିୱାଲ ପ୍ରଶ୍ନ କରିଛନ୍ତି। ସାହିପରି ଗତକାଲି ଗୁଜରାଟ ଗସ୍ତ ବେଳେ ଯଦି ଗୁଜରାଟରେ ଆମ ଆଦମୀ ପାର୍ଟି(ଆପ) ସରକାର ଆସେ ତେବେ ମହିଳାମାନଙ୍କୁ ମାସିକ ଭତ୍ତା ମିଳିବ ବୋଲି କହିଥିଲେ । ରାଜ୍ୟର ୧୮ ବର୍ଷରୁ ଊର୍ଦ୍ଧ୍ୱ ମହିଳାଙ୍କୁ ମାସିକ ୧୦୦୦ ଟଙ୍କା ଭତ୍ତା ମିଳିବ। ଏହି ୧୦୦୦ ଟଙ୍କା ରେବିଡ଼ି(ମାଗଣା ବଣ୍ଟନ) ନୁହଁ ବୋଲି କେଜ୍ରିୱାଲ କହିଛନ୍ତି। ଏହା ହେଉଛି ଆପଣଙ୍କ ଅଧିକାର । ଲୋକଙ୍କ ଅର୍ଥ ଲୋକଙ୍କ ପାଖକୁ ଯିବା ଉଚିତ। ଏହା ସ୍ୱିସ ବ୍ୟାଙ୍କକୁ ଯିବା ଉଚିତ ନୁହଁ ବୋଲି କେଜ୍ରିୱାଲ କହିଛନ୍ତି।
କେନ୍ଦ୍ର ଗରିବଙ୍କ ଉପରେ ଟ୍ୟାକ୍ସ ଭିଡ଼ୁଛି, ଧନୀଙ୍କୁ ଋଣ ଛାଡ଼ୁଛି – କେଜ୍ରିୱାଲ…!
