ଉପ ରାଷ୍ଟ୍ରପତି ହେବାକୁ ଚାହୁଁଥିଲେ କି ନୀତୀଶ କୁମାର? ଜବାବ ଦେଲେ ବିହାର ମୁଖ୍ୟମନ୍ତ୍ରୀ…!

ଏଥର ସମ୍ଭାଳ ବ୍ୟୁରୋ(ନୂଆଦିଲ୍ଲୀ)- ବିଜେପି ସମର୍ଥନରେ ଦେଶର ରାଷ୍ଟ୍ରପତି ହେବାକୁ ଚାହୁଁଥିଲେ ନୀତୀଶ କୁମାର। ଏଥିପାଇଁ ଜେଡିୟୁର କିଛି ନେତାଙ୍କ ଜରିଆରେ ଲବି ମଧ୍ୟ ଚଳାଇଥିଲେ। ହେଲେ ଏହା ସମ୍ଭବ ନ ହେବାରୁ ସେ ବିଜେପି ହାତ ଛାଡ଼ି ଦେଇଛନ୍ତି। ରାଜ୍ୟସଭା ସାଂସଦ ତଥା ବିଜେପି ନେତା ସୁଶୀଲ ମୋଦିଙ୍କ ଏପରି ଦାବିକୁ ନେଇ ହଇଚଇ ସୃଷ୍ଟି ହୋଇଛି। ତେବେ ସୁଶୀଲ ମୋଦିଙ୍କ ଏପରି ଦାବିକୁ ଖଣ୍ଡନ କରିଛନ୍ତି ନିଜେ ନୀତୀଶ କୁମାର। ବିହାର ମୁଖ୍ୟମନ୍ତ୍ରୀ ଭାବେ ୮ମ ଥର ପାଇଁ ଶପଥ ନେବା ପରେ ଆଜି ନୀତୀଶ କୁମାର କହିଛନ୍ତି, “ଆମେ(ଜେଡିୟୁ) ରାଷ୍ଟ୍ରପତି ଓ ଉପ ରାଷ୍ଟ୍ରପତି ନିର୍ବାଚନରେ ଏନଡିଏ ପ୍ରାର୍ଥୀଙ୍କୁ ସମର୍ଥନ କରିଛୁ। ମୁଁ ଉପ ରାଷ୍ଟ୍ରପତି ହେବାକୁ ଚାହୁଁଥିଲି ବୋଲି ଏବେ କିଛି ଲୋକ ଦାବି କରିବା କେବଳ ଗୋଟିଏ ଜୋକ।” ବୁଧବାର ସୁଶୀଲ ମୋଦି କହିଥିଲେ ଯେ “ଜନତା ଦଳ ୟୁନାଇଟେଡ(ଜେଡିୟୁ)ର କିଛି ନେତା ମୋ ପାଖକୁ ଆସି ନୀତୀଶ କୁମାରଙ୍କୁ ଉପ ରାଷ୍ଟ୍ରପତି କରିବାକୁ ପ୍ରସ୍ତାବ ଦେଇଥିଲେ। ସେ ଉପ ରାଷ୍ଟ୍ରପତି ହେଲେ ମୁଁ ବିହାର ମୁଖ୍ୟମନ୍ତ୍ରୀ ଭାବେ କାମ କରିବାର ସୁଯୋଗ ପାଇବି ବୋଲି ମଧ୍ୟ ସେମାନେ କହିଥିଲେ।” ସୁଶୀଲ ମୋଦିଙ୍କ ଏପରି ଦାବିକୁ ଗତକାଲି ଜେଡିୟୁର ରାଷ୍ଟ୍ରୀୟ ଅଧ୍ୟକ୍ଷ ଲଲନ ସିଂହ ମଧ୍ୟ ଖଣ୍ଡନ କରିଥିଲେ। ସେ କହିଥିଲେ ଯେ “କିଛି ମିଡିଆ ରିପୋର୍ଟରେ ପ୍ରକାଶ ପାଇଥିଲେ ଯେ ନୀତୀଶ କୁମାର ବିରୋଧୀ ମେଣ୍ଟର ରାଷ୍ଟ୍ରପତି କିମ୍ବା ଉପ ରାଷ୍ଟ୍ରପତି ପ୍ରାର୍ଥୀ ହୋଇ ପାରନ୍ତି। ଯଦି ସେମିତି କିଛି ଯୋଜନା ରହିଥାଆନ୍ତା, ତା’ହେଲେ ବିଜେପି ସହ ଆମେ ସମ୍ପର୍କଚ୍ଛିନ୍ନ କରି ଦେଇଥାଆନ୍ତୁ। ହେଲେ ଜେଡିୟୁ ସେପରି କୌଣସି ସମ୍ଭାବନା ନଥିବା ସେତେବେଳେ କହିଥିଲା ଓ ଏବେ ବି କହୁଛି। ସେମାନେ(ବିଜେପି) କେବଳ କାହାଣୀ ତିଆରି କରୁଛି।”