ଏଥର ସମ୍ଭାଳ ବ୍ୟୁରୋ (ଭୁବନେଶ୍ଵର) – ପୌର ଓ ପଂଚାୟତ ନିର୍ବାଚନକୁ ନେଇ ଅନିଶ୍ଚିତତା ଲାଗି ରହିଥିବାବେଳେ ରାଜ୍ୟରେ ବିଜେପି ପରେ ଏବେ କଂଗ୍ରେସ ନିଜର ନିର୍ବାଚନ ପ୍ରସ୍ତୁତି ଆରମ୍ଭ କରିଛି। ବିଜେପି ପୌର ନିର୍ବାଚନ ପାଇଁ ୧୯ଜଣିଆ କମିଟି ଗଢ଼ିବାର ଦିନକ ପରେ ପ୍ରଦେଶ କଂଗ୍ରେସ ଆଜି ପଂଚାୟତ ନିର୍ବାଚନ ପାଇଁ ରାଜ୍ୟସ୍ତରୀୟ କମିଟି ଗଠନ କରିଛି। ଦଳ ପକ୍ଷରୁ ମିଳିଥିବା ସୂଚନା ଅନୁସାରେ, ପିସିସି ସଭାପତି ନିରଞ୍ଜନ ପଟ୍ଟନାୟକ ଆଗାମୀ ପଂଚାୟତ ନିର୍ବାଚନ ପାଇଁ ଏକ ରାଜ୍ୟସ୍ତରୀୟ କମିଟି ଘୋଷଣା କରିଛନ୍ତି। କମିଟିର ଆବାହକ ଭାବେ ବରିଷ୍ଠ ନେତା ଯଜେ୍ଞଶ୍ୱର ବାବୁ ଥିବାବେଳେ ସଦସ୍ୟ ଭାବେ ଉମାବଲ୍ଲଭ ରଥ, ମନୋରଞ୍ଜନ ଦାଶ, କୈଳାସ ସାହୁ ଓ ଦେଓପ୍ରସାଦ ସଦସ୍ୟ ଅଛନ୍ତି। ତୃଣମୂଳ ସ୍ତରରୁ ଜିଲ୍ଲାସ୍ତର ପର୍ଯ୍ୟନ୍ତ ପଂଚାୟତ ସଂଗଠନକୁ ସୁଦୃଢ଼ ସହ ନିର୍ବାଚନ ପାଇଁ ପ୍ରସ୍ତୁତ କରାଯିବ ସେନେଇ ସବିଶେଷ ତଥ୍ୟ ସଂଗ୍ରହ କରି ଏକ ରିପୋର୍ଟ ପ୍ରଦାନ କରିବାକୁ ପିସିସି ସଭାପତି ଶ୍ରୀ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି। ସୂଚନାଯୋଗ୍ୟ, ବିଜେପି ପୌର ନିର୍ବାଚନ ପାଇଁ ଗତକାଲି ୧୯ଜଣିଆ କମିଟି ଗଠନ କରିଥିବାବେଳେ ପୂର୍ବରୁ ପଂଚାୟତ ନିର୍ବାଚନକୁ ଦୃଷ୍ଟିରେ ରଖି ଦଳୀୟ ସଂଗଠନକୁ ସୁଦୃଢ଼ କରିବା ପାଇଁ ଏକ କମିଟି କରିଥିଲା।
ପଞ୍ଚାୟତ ନିର୍ବାଚନ ପାଇଁ କମିଟି ଗଢ଼ିଲା କଂଗ୍ରେସ …!
