ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ଅଯୋଧ୍ୟାରେ ରାମ ମନ୍ଦିର ଜମି କିଣାରେ ଦୁର୍ନୀତି ଅଭିଯୋଗ ଆଣିଥିବା ଆପ୍ ସାଂସଦ ସଞ୍ଜୟ ସିଂହଙ୍କ ଘର ଉପରେ ଆକ୍ରମଣ ହୋଇଛି। ଏହି ଆକ୍ରମଣ ପଛରେ ବିଜେପିର ହାତ ଥିବା ଶ୍ରୀ ସିଂହ ଅଭିଯୋଗ କରିଛନ୍ତି। ଆପ ପକ୍ଷରୁ କୁହାଯାଇଛି ଯେ ଉତ୍ତର ଆଭିନ୍ୟୁ ଅଞ୍ଚଳରେ ଥିବା ସଞ୍ଜୟ ସିଂହଙ୍କ ଘରର ନେମ ପ୍ଲେଟକୁ ବିଜେପି ସମର୍ଥକମାନେ କଳା ବୋଳିବା ସହ ଭାଙ୍ଗି ଦେଇଛନ୍ତି। ସେହିପରି ଦୁଇ ଜଣ ବ୍ୟକ୍ତି ଜୋରଜବରଦସ୍ତି ଘର ଭିତରେ ପ୍ରବେଶ କରିବାକୁ ଉଦ୍ୟମ ମଧ୍ୟ କରିଥିଲେ। ପୁଲିସ୍ ଘଟଣାରେ ଦୁଇ ଜଣଙ୍କୁ ଅଟକ ରଖିଛି ଓ ଏଥିରେ କେହି ଆହତ ହୋଇ ନଥିବା କହିଛି। ସଞ୍ଜୟ ସିଂହ ଟ୍ୱିଟ କରି କହିଛନ୍ତି, “ମୋ ଘର ଉପରେ ଆକ୍ରମଣ କରାଯାଇଛି। ବିଜେପି ସମର୍ଥକମାନେ ଧ୍ୟାନ ଦେଇ ଶୁଣନ୍ତୁ, ଆପଣମାନେ ଯେତେ ଗୁଣ୍ଡାଗର୍ଦ୍ଦି ଓ ଭଙ୍ଗାରୁଜା କଲେ ମଧ୍ୟ ମୁଁ କେବେ ହେଲେ ରାମ ମନ୍ଦିର ନିର୍ମାଣ ପାଇଁ ସଂଗ୍ରହ ହୋଇଥିବା ଟଙ୍କାକୁ ଚୋରି ହେବାକୁ ଦେବନି ନାହିଁ। ଏଥିପାଇଁ ମୋ ଜୀବନ ଚାଲିଗଲେ ମଧ୍ୟ ମୁଁ ପଛାଇବି ନାହିଁ।” ତେବେ ବିଜେପି ପକ୍ଷରୁ ସଞ୍ଜୟ ସିଂହଙ୍କ ଅଭିଯୋଗକୁ ଡ୍ରାମା ବୋଲି କୁହାଯାଇଛି। ଦିଲ୍ଲୀ ବିଜେପି ମୁଖପାତ୍ର ପ୍ରବୀଣ ଶଙ୍କର କପୁର କହିଛନ୍ତି, “ଗତକାଲି ସେ ରାମ ମନ୍ଦିର ନିର୍ମାଣ କାମକୁ ବଦନାମ କରିବାକୁ ଚେଷ୍ଟା କରିଥିଲେ। ଆଜି ସେ ନିଜ ଘର ଉପରେ ଆକ୍ରମଣ ହୋଇଥିବା କହୁଛନ୍ତି। ଏହା ଲିଖିତ ବା ଯୋଜନାବଦ୍ଧ ଡ୍ରାମା।” ସୂଚନାଯୋଗ୍ୟ, ରବିବାର ସଞ୍ଜୟ ସିଂହ ସାମ୍ବାଦିକ ସମ୍ମିଳନୀ କରି କହିଥିଲେ ଯେ ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ସାଧାରଣ ସମ୍ପାଦକ ଚମ୍ପତି ରାୟ ଅଯୋଧ୍ୟାର ବାଗ ବଜାଇସିରେ ଥିବା ୨ କୋଟି ଟଙ୍କା ମୂଲ୍ୟର ୧.୨୦୮ ହେକ୍ଟରର ଜମିକୁ ଅନୀଲ ମିଶ୍ରଙ୍କ ସହାୟତାରେ ୧୮.୫ କୋଟି ଟଙ୍କାରେ କିଣିଛନ୍ତି। କିଛି ମିନିଟ୍ ପୂର୍ବରୁ ଯେଉଁମାନେ ୨ କୋଟି ଟଙ୍କାରେ ଜମି କିଣିଥିଲେ ସେମାନଙ୍କ ଠାରୁ ୧୮.୫ କୋଟିରେ ଜମି କିଣାଯାଇଛି। ଶ୍ରୀ ସିଂହ ଘଟଣାର ସିବିଆଇ ଓ ଇଡି ଦ୍ୱାରା ତଦନ୍ତ କରିବାକୁ ମଧ୍ୟ ଦାବି କରିଥିଲେ।
ସାଂସଦ ସଞ୍ଜୟ ସିଂହଙ୍କ ଘର ଉପରେ ଆକ୍ରମଣ, ବିଜେପି ହାତ ଥିବା ଅଭିଯୋଗ..!
