ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ଦେଶର ପ୍ରଥମ ରାଷ୍ଟ୍ରପତି ରାଜେନ୍ଦ୍ର ପ୍ରସାଦଙ୍କ ପରେ ଗୁରୁବାର ରାଷ୍ଟ୍ରପତି ରାମନାଥ କୋବିନ୍ଦ ଦ୍ୱିତୀୟ ରାଷ୍ଟ୍ରପତି ଭାବରେ କୁମ୍ଭମେଳା ଗସ୍ତ କରିବା ସହିତ ସସ୍ତ୍ରୀକ ସଙ୍ଗମସ୍ଥଳୀରେ ପ୍ରାର୍ଥନା କରିଛନ୍ତି ।ଏହି ଅବସରରେ ସେ ପରମାର୍ଥ ନିକେତନ କ୍ୟାମ୍ପଠାରେ ୩ ଦିନ ଧରି ଚାଲିବାକୁ ଥିବା ‘ଗାନ୍ଧିଆନ୍ ରିସର୍ଜେନ୍ସ ସମ୍ମିଟ୍’ ଉଦ୍ଘାଟନ କରିଛନ୍ତି। ଏହି ଗସ୍ତ ତାଙ୍କ ପାଇଁ ସୌଗ୍ୟର କଥା ବୋଲି ସେ କହିଛନ୍ତି।ରାଷ୍ଟ୍ରପତି ଭବନର ଟ୍ୱିଟର ଆକାଉଣ୍ଟରେ ଏ ଗସ୍ତ ନେଇ ପୋଷ୍ଟ କରାଯାଇଛି, “୧୯୫୩ ମସିହାରେ ତତ୍କାଳୀନ ରାଷ୍ଟ୍ରପତି ରାଜେନ୍ଦ୍ର ପ୍ରସାଦଙ୍କ ପରେ ପ୍ରଥମ ରାଷ୍ଟ୍ରପତି ଭାବରେ ଏହା ପ୍ରଥମ ଗସ୍ତ।”
କୁମ୍ଭମେଳା ଭାରତର ଆଧ୍ୟାତ୍ମିକ ଏବଂ ସାଂସ୍କୃତିକ ଐତିହ୍ୟର ଗୁରୁତ୍ୱପୂର୍ଣ୍ଣ ଅଙ୍ଗ ବୋଲି ରାଷ୍ଟ୍ରପତି କୋବିନ୍ଦ କହିଥିବା ଏଥିରେ ଉଲ୍ଲେଖ କରାଯାଇଛି।
ଶ୍ରୀଯୁକ୍ତ କୋବିନ୍ଦ ଏବଂ ତାଙ୍କ ପତ୍ନୀ ସବିତା କୋବିନ୍ଦ ଏକ ସ୍ୱତନ୍ତ୍ର ବିମାନ ଯୋଗେ ବାମ୍ରୌଲି ବିମାନବନ୍ଦରରେ ସକାଳ ୯.୩୦ରେ ପହଞ୍ଚିଥିଲେ। ସେଠାରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ କିଛି କ୍ୟାବିନେଟ୍ ମନ୍ତ୍ରୀ ତାଙ୍କୁ ସ୍ୱାଗତ କରିଥିଲେ।