ଏଥର ସମ୍ଭାଳ ବ୍ୟୁରୋ (ନୂଆଦିଲ୍ଲୀ) – ଅତି ଭୀଷଣ ରୂପ ଧାରଣ କରି ବାତ୍ୟା ୟାସ ଓଡ଼ିଶାର ସ୍ଥଳ ଭାଗ ଆଡ଼କୁ ମାଡ଼ି ଆସୁଛି। ଆଉ କିଛି ସମୟ ପରେ ଏହାର ଲ୍ୟାଣ୍ଡଫଲ ପ୍ରକ୍ରିୟା ଆରମ୍ଭ ହେବ। ଧାମରାର ଉତ୍ତର ଓ ବାଲେଶ୍ୱରର ଦକ୍ଷିଣରେ ଏହା ଉପକୂଳ ଅତିକ୍ରମ କରିବ। ବାତ୍ୟା ପରେ ଲୋକଙ୍କୁ ସହାୟତା ଓ ରିଲିଫ ପଠାଇବା ପାଇଁ ବାୟୁସେନା ମଧ୍ୟ ପ୍ରସ୍ତୁତ ହୋଇ ରହିଛି। ଲୋକଙ୍କ ସହାୟତା ପାଇଁ ବାୟୁସେନା ପକ୍ଷରୁ ୧୧ଟି ପରିବହନ ବିମାନ ଓ ୨୫ଟି ହେଲିକପ୍ଟରକୁ ଷ୍ଟାଣ୍ଡବାଏରେ ରଖାଯାଇଛି। ବାୟୁସେନା ପକ୍ଷରୁ ଷ୍ଟାଣ୍ଡବାଏରେ ରହିଥିବା ୧୧ ପରିବହନ ବିମାନ ମଧ୍ୟରେ ୩ଟି ସି-୧୩୦, ୪ଟି ଏଏନ୍-୩୨ ଓ ୨ଟି ଡ୍ରୋନିୟର ଏୟାରକ୍ରାଫ୍ଟ ରହିଛି। ସେହିପରି ଅତିରିକ୍ତ ୨୫ଟି ହେଲିକପ୍ଟର ମଧ୍ୟରେ ୧୧ଟି ଏମଆଇ-୧୭ଭି୫, ଦୁଇଟି ଚେତକ, ୩ଟି ଚିତା ଓ ୭ଟି ଏମଆଇ-୧୭ ରହିଛି। ଦରକାର ପଡ଼ିଲେ ଲୋକଙ୍କୁ ଉଦ୍ଧାର ଓ ରିଲିଫ ସାମଗ୍ରୀ ବାୟୁସେନା ପକ୍ଷରୁ ଏହି ବିମାନ ଜରିଆରେ କରାଯିବ। ସବୁ ପ୍ରକାରର ପରିସ୍ଥିତି ପାଇଁ ବାୟୁସେନା ପ୍ରସ୍ତୁତ ଥିବା କହିଛି। କେବଳ ବାୟୁସେନା ନୁହେଁ ନୌସେନା ମଧ୍ୟ ୪ଟି ଯୁଦ୍ଧ ଜାହାଜ ସହ ଏକାଧିକ ହେଲିକପ୍ଟର ବାତ୍ୟା ୟାସରେ ସହାୟତା କରିବାକୁ ଷ୍ଟାଣ୍ଡବାଏରେ ରଖିଛି। ଓଡ଼ିଶା ଓ ପଶ୍ଚିମବଙ୍ଗ ଉପକୂଳରେ ନୌସେନାର ୮ଟି ଫୁଡ ରିଲିଫ ଟିମ ଓ ୪ଟି ଡାଇଭିଂ ଟିମ୍ ମୁତୟନ ହୋଇଛନ୍ତି।
ବାତ୍ୟା ମୁକାବିଲା ପାଇଁ ବାୟୁସେନାର ୧୧ ପରିବହନ ବିମାନ ଓ ୨୫ ହେଲିକପ୍ଟର ପ୍ରସ୍ତୁତ…!
